एकिकृत अखिल नेपाल शिक्षक संगठन अर्घाखाँचीको अनलाईन बैठक सम्पन्न ,बिभिन्न बिभाग गठन


श्याम घिमिरे
साउन २६ अर्घाखाँची –

एकिकृत अखिल नेपाल शिक्षक संगठन अर्घाखाँचीको अनलाईन बैठक सोमबार सम्पन्न भएको छ । संगठनका जिल्ला अध्यक्ष युबराज भुसालको अध्यक्षता,उपाध्यक्ष माधवा भुसालको स्वागत मनतब्य र सचिब बसन्त बहादुर खड्काको सञ्चालनमा सम्पन्न बैठकमा संगठनका केन्द्रिय उपाध्यक्ष मानबहादुर पाण्डेले बर्तमान समयमा कोभिड–१९ ले शिक्षा क्षेत्रमा पारेको प्रभाब,बैकल्पीक शिक्षण बिधि र संगठनले देशव्यापी रुपमा संचालन गरेको पेशागत आन्दोलनको अनलाईन अभियानका साथै बिभाग गठनको औचित्यको बारेमा प्रकाश पार्नुभएको थियो ।


बैठकले रोमा खनालको संयोजकत्वमा ११ सदस्यीय महिला शिक्षक बिभाग गठन गरेको छ । जसको ईन्चार्जमा माधबा भुसाल चयन हुनुभएको छ । यस्तै चुरामणी केसी ईन्चार्ज र रुद्र पोख्रेल संयोजक रहेको ११ सदस्यीय राहत शिक्षक बिभाग र खुमबहादुर बस्नेत संयोजक रहेको ७ सदस्यीय साबिक उच्च माबि शिक्षक बिभाग गठन गरेको संगठनले जनाएको छ ।


बैठकमा संगठनका केन्द्रीय सदस्य शुभाषचन्द्र बन्जाडे,सल्लाहकार संयोजक कमल घिमिरे,दिनानाथ पराजुली,झबिन्द्र खड्का लगायतको आतिथ्यता रहेको थियो ।

नेपालमा काेराेना संक्रमित बढ्दै, २४ घण्टामा थपिए ३ सय ३८ जना ,काठमाडाैं उपत्यकामा थपिए ४४ जना

साउन २६, २०७७  काठमाडौं : उपत्यकामा ९२ जनासहित देशभर साेमबार ३ सय ३८ जनामा कोरोना संक्रमण पुष्टि भएको छ। देशभरका ३७ वटा प्रयोगशालामा गरिएको परीक्षणमा काठमाडौं उपत्यकामा ४४ जनामा काेराेना देखिएको हो।  स्वास्थ्य तथा जनसंख्या मन्त्रालयको नियमित पत्रकार ब्रिफिङमा प्रवक्ता प्राडा जागेश्वर गौतमले यसबारे बताएका हुन्। त्यसैगरी साेमबार देशभर १ सय ४० जना डिस्चार्ज भएका छन्। सोमबार देशभर संक्रिय संक्रमित ६७३८ रहेका छन्। हाल १० हजार ७ सय ५९ जना क्वारेन्टाइनमा छन्। आजसम्म १६ हजार ४ सय ९३ डिस्चार्ज भएका गाैतमले जानकारी दिए।

‘नाका सिल नगरेसम्म काठमाडौंले कोरोनालाई थेग्‍न सक्दैन’ भीड जम्मा हुने नाराजुलुस र अनशन बन्द गरौं

साउन २६, २०७७ काठमाडौं : काठमाडौं महानगरपालिकाका प्रमुख (मेयर) विद्यासुन्दर शाक्यले उपत्यकाका सबै नाकालाई सिल नगरेसम्म उपत्यका भित्र संक्रमण नियन्त्रणमा नआउने बताएका छन्।  उपत्यकामा समुदायस्तरमा संक्रमण अझै पनि कम देखिएको र यसलाई नियन्त्रण गर्न सबै नाकामा शील गर्नुपर्ने मेयर शाक्यले बताएका हुन्। न्यूज एजेन्सी नेपालका सम्वाददातासँग कुराकानी गर्दै शाक्यले उपत्यकामा समुदायमा भन्दा बाहिरी जिल्लाबाट आएका व्यक्तिमा संक्रमण देखिएकाले त्यसलाई नियन्त्रण गर्न नाकामा सिल गर्नुपर्ने बताएका हुन्।  उनले अहिले नै सिल नगर्ने हो भने संक्रमण नियन्त्रण भन्दा बाहिर जान सक्ने बताए। ‘उपत्यकामा संक्रमण फैलियो भने रोक्न धेरै गाह्रो हुन सक्छ। यहाँ घना बस्ती छ। एउटै घरमा धेरै व्यक्ति बस्छन्। घरधनी एकजना छ भने त्यही घरमा बहालमा बस्नेहरु धेरै छन्। एउटै कोठामा धेरै व्यक्ति बसेका छन्। यहाँ बिजनेस कम्प्लेक्स धेरै छन्। बजार धेरै छ। यहाँ बजारमा आवतजावत गर्दा एक व्यक्ति र अर्को व्यक्ति ठोकिने सम्भावना धेरै छ’, उनले भने, त्यसकारण त्यो बेला नै हामीले भनेका थियौं उपत्यका सिल गरौं। उपत्यकामा कडा गरौं।

उपत्यका भित्रका ४० लाख व्यक्तिमा खुकुलो गरौं। तर केही व्यक्तिलाई काठमाडौं भित्र छिराउँदा काठमाडौंमा शान्त पोखरीमा ढुंगा हानेजस्तो हुन्छ।’  उनले सरकाले लकडाउन खोलेपनि लामो दुरीका सवारीसाधन चलाउन नदिएकाले यसलाई एक किसिमको लकडाउन नै मानेर आवतजावत बन्द गर्नुपर्ने बताएका छन्।  एक जिल्लाबाट अर्को जिल्लामा जान निषेध गर्नु भनेको संक्रमण फैलन नदिनु भएकाले त्यसमा ध्यान दिन आग्रह गरे। उपत्यकामा अहिले पनि समुदायस्तरमा धेरै संक्रमण नदेखिएकाले यसलाई अहिले नै नियन्त्रण गर्नुपर्नेमा शाक्यले जोड दिए।  ‘लकडाउन खोलेको छ। तर सरकारले अहिले पनि लामो दुरीका सवारीसाधन चलाउन सहमति दिएको छैन। नदिनु भनेको अहिले पनि लकडाउन नै हो। लकडाउनको स्वरुप फेरिएको हो। एउटा जिल्लाबाट अर्को जिल्लामा निषेध गरिएको छ। त्यसकारण अहिले काठमाडौंमा जतिपनि भेटिएका छन्’, उनले भने, ‘यहाँ समुदायस्तरमा धेरै पुगेको छैन। केही स्थानीय व्यक्तिमा भेटियो तर अहिले पनि विभिन्‍न पेशा व्यवसायका लागि काठमाडौं बाहिरबाट आएकोमा देखिएको छ। त्यसकारण हामीले नियन्त्रण गर्नुपर्छ। यसलाई वास्ता नगर्ने, हेलचेक्रयाइँ गर्ने हो भने रोक्न गाह्रो हुन्छ।’

मेयर शाक्यले महानगरपालिकाले भनेको निर्णय नागरिकले नमानेर लुकिछिपी आउने प्रवृत्तिले संक्रमणको अहिलेको स्थिति देखा परेको बताए। ‘हामीले भनेको निर्णय मानिदिएको भए काठमाडौं उपत्यकामा कुनै पनि संक्रमण देखिनेवाला थिएन’, उनले भने, ‘हाम्रो कुरा सरकारले मानिदियो हामीले सरकारसँग अनुरोध गरेका थियौं। नाकामा कडाई गर्न भन्यौं गृह मन्त्रालयले त्यही अनुसार परिपत्र जारी गरेको छ। तर यहाँ लुकिछिपी आउने प्रवृत्ति रह्यो।’  कोरोना रोकथाम तथा नियन्त्रणका लागि विभिन्न मठमन्दिर, बिहार, धर्मशालाका गतिविधिहरु बन्द गराइएको तर सरकारलाई दबाब दिने नाउँमा हुने जुलुस र नाराबाजीका कारण जोखिम बढेको बताए।  उनले सरकारको समर्थन र विरोध गर्ने गतिविधि नगर्न समेत आग्रह गरे।  ‘कोरोनाको जोखिम भएसम्म मठमन्दिरहरू बन्द गरेका छौं। धर्मशालाहरू बन्द गरेका छौं। विहारहरू बन्द गरेका छौं। मन्दिरहरूमा अहिले हामीले भेटघाट गर्न दिएका छैनौं’, शाक्यले भने ‘त्यो सँगै विभिन्‍न ठाउँमा हुने गतिविधि पनि रोक्नुपर्छ। यहाँको नारा जुलुस गर्ने पनि रोक्नुपर्छ। यहाँ काठमाडौंमा अनसन बस्ने अरु विभिन्न गतिविधि गर्ने सरकारको समर्थनमा होस वा सरकारको विरोधमा होस त्यो सबै गतिविधि रोक्नुपर्छ।’ 

शाक्यले सरकाले पिसिआर परीक्षण गर्ने भन्दा पनि संक्रमण नै फैलन नपाउने गरी काम गर्नुपर्नेमा जोड दिए। पीसीआर परीक्षण कुनै औषधि नभएकाले यसलाई रक्षात्मक रुपमा लिनुपर्ने तर संक्रमणको रोकथामका लागि प्रतीकात्मक कदम चाल्नुपर्ने बताए।  उनले पिसिआर बढाउने भन्दा संक्रमण फैलन नदिन काम गर्नुपर्ने बताए। ‘मेरो भनाई के हो भने पीसीआर औषधि होइन। पीसीआर भनेको परीक्षण मात्रै हो। परीक्षणले आजको स्थिति मात्रै जनाउँछ त्यसले औषधिको काम गर्दैन’, उनले भने, ‘एकपटक पिसिआर परीक्षण गरेपछि फेरि समुदायमा जाँदा संक्रमण फैलिन्‍न भन्‍न सकिँदैन। मैले आज पनि डाटा लिएको छु, थानकोट नाकामा १० हजारको पिसिआर गराएको छ, कति त पिसिआर नगरी छिरेका छन्। १० हजार मान्छेको पिसिआर गराउँदा त्यसको खर्च कति होला?’ उनले कोरोना लागेर उपचारभन्दा लाग्नै नदिने रणनीति बनाउनुपर्ने बताए। ‘हामीले डिफेन्सिभ होइन अफेन्सिभ ढंगले जानुपर्छ। हामीले रोग लागेपछि उपचार गर्नुपर्छ भन्दा पनि रोग नै लाग्न नदिनको लागि अगाडि बढ्नुपर्छ’, उनले थपे, ‘अनि पिसिआर बढाऔं, हुलमुल नगरौं, स्वास्थ्य मापदण्ड पालना गर्नुपर्छ भन्‍ने अनि त्यहाँ सबै क्याटवाल्क गराएर फेसन शो गराएर पत्रकारलाई भेला गराउँदा त्यहाँ रोग फैलने सम्भावना हुँदैन।’ सरकारले काम नै गर्न सकेन भन्‍ने आरोप लगाउने भन्दा पनि सरकारी मापदण्ड र नियमहरूलाई पालन गर्न आग्रह गरे। मापदण्ड र नियमलाई पालना नगरे आगामी दिनमा भयावह स्थिति आउन सक्ने र स्थिति नियन्त्रण बाहिर जानसक्ने शाक्यले बताए। 

काठमाडौं बचाउनका लागि मेयर अथवा काठमाडौंका जनप्रतिनिधिले गरेको निर्णय भनेर बुझि दिनुपर्छ। राम्रा निर्णयहरु कार्यान्वयन गर्न गृह प्रशासनले पनि हामीले गरेका निर्णयहरु कार्यान्वयन गर्न सहयोग गर्नुपर्छ’, उनले थपे, ‘जिल्ला प्रशासनले पनि हामीले गरेका निर्णयहरु कार्यान्वयन गर्न सहयोग गर्नुपर्छ। त्यसैगरी अन्य संघीय मामिला मन्त्रालय जोसँग सबन्धित छ, श्रमसँग सम्बन्धित होला, कहिले खाद्यान्‍नसँग सम्बन्धित होला, कहिले स्वास्थ्यसँग सम्बन्धित होला सम्बन्धित मन्त्रालयले कार्यान्वयन गर्न सहयोग गर्नुपर्छ।’ source:thahakhabar.com

विश्वमा कोरोना संक्रमितको संख्या दुई करोड नाघ्यो, भारतमा थपिए ६२ हजार, एक कराेड २८ लाख बढी निको भए

साउन २६, २०७७ काठमाडौं : विश्वभर कोरोना संक्रमितको संख्या २ करोड नाघेको छ।  पछिल्लो २४ घण्टामा २ लाख १२ हजारभन्दा बढी संक्रमित थपिएसँगै विश्वमा संक्रमितको संख्या २ करोड ९ हजार पुगेको हो।  पछिल्लो २४ घण्टामा भारतमा सबैभन्दा बढी ६२ हजार संक्रमित थपिएका छन्। लगातार ठूलो संख्यामा संक्रमित थपिइरहेको भारतमा कुल संक्रमितको संख्या २२ लाख १४ हजार पुगेको छ। त्यहाँ पछिल्लो २४ घण्टामा १ हजार १३ जनाको मृत्यु भएको छ। योसहित भारतमा कुल मृतकको संख्या ४४ हजार ४ सय ६६ पुगेको छ।

यस्तै अमेरिकामा ४७ हजार ८१४, ब्राजिलमा २२ हजार २१३, रसियामा ५ हजार, दक्षिण अफ्रिकामा ६ हजार ६७१ तथा मेक्सिकोमा ६ हजार ४९५ संक्रमित थपिएका छन्।  विश्वभर कोरोना भाइरसको संक्रमणबाट मृत्यु हुनेको संख्या ७ लाख ३३ हजार ३६० पुगेको छ। यस्तै एक करोड २८ लाख मानिस उपचारपछि निको भएर घर फर्किएका छन्।