अर्घाखाँचीमा थप ७ जनामा कोरोना संक्रमण, संक्रमितको संख्या ३५४ पुग्यो

श्याम घिमिरे
भदौ १५ अर्घाखाँची –

अर्घाखाँचीमा सोमवार थप ७ जनामा कोरोना संक्रमण पुष्टि भएको छ । जिल्लाको सन्धिखर्क नगरपालीकामा ६ जना र शितगंगा नगरपालीकामा १ जना गरी जम्मा ७ जनामा कोरोना संक्रमण देखिएकोे जिल्ला प्रशासन कार्यालय अर्घाखाँचीले जनाएको छ । ७ जना मध्ये २ जना भारतबाट आई क्वरेन्टीमा बसेका हुन भने अन्य ५ जना समुदाय स्तरका रहेको बताईएकोे छ । यो संगै जिल्लामा कोरोना संक्रमितको संख्या ३५४ पुगेको छ । हालसम्म सन्धिखर्क नगरपालीकामा ५६ जना, शितगंगा नगरपालीकामा ६९ जना, भुमिकास्थान नगरपालिकामा ११७ जना ,मालारानी गाउँपालीकामा ७० जना, पाणिनी गाउँपालिकामा १४ जना र छत्रदेब गाउँपालीकामा २८ जना गरी ३५४ जनामा कोरोना संक्रमण देखिएको छ ।

संक्रमित मध्ये हाल सन्धिखर्क नगरपालीकामा १२ जना ,शितगंगा नगरपालीकामा ३ जना ,भुमिकास्थान नगरपालीकामा ८ जना र मालारानी गाउँपालीकामा २ जना गरी जम्मा २५ जना सक्रिय संक्रमितहरु बिभिन्न आइसोलेसनमा उपचाररत रहेका छन् । यस्तै संक्रमितमध्ये ३२६ जना निको भएर घर फर्किएको को प्रशासनले जनाएको छ । यसअघि कोरोना संक्रमणका कारण शितगंगा नगरपालीका, भुमिकास्थान नगरपालीका र मालारानी गाउँपालीकाका १/१ जना गरी जम्मा ३ जनाको मृत्यु भैसकेको छ ।

यसैबिच आज दिउँसोसम्म ६४ जना व्यक्तिहरु जिल्लाका बिभिन्न क्वरेन्टीनमा रहेका छन् । पछिल्लो २४ घण्टामा भुमिकास्थान नगरपालीकाको क्वरेन्टीनबाट १९ जना डिस्चार्ज भएका छन भने शितगंगा नगरपालीकाको क्वरेन्टीनमा ९ जना थपिएका छन ।

Advertisement

काेराेना खाेप बनाउन पहिलाे हुने दाैडमा ‘फाेहाेरी खेल’ भइरहेकाे छ : विज्ञ

भदौ १४, काठमाण्डाै – विज्ञहरुले कोरोना भाइरसको खोप विकास गर्न पहिलो हुने दौडमा ‘चोर बाटो’ र ‘फोहाेरी खेल’ भइरहेको आरोप लगाएका छन् । कोभिड–१९ खोप आधुनिक समयको सबैभन्दा मूल्यवान् र उत्सुकताका साथ खोजी गरिएको पुरस्कारमध्ये एक भएकोले यसको श्रेय लिन शक्ति राष्ट्रहरु लागिपरेका विज्ञले बताएका छन् । यो क्रममा शक्ति राष्ट्रहरु चोर बाटो प्रयोग गर्ने, राजनीतिक विषय बनाउने, सूचना चोरी तथा ह्याक गरेको जस्ता आरोप प्रत्यारोप गर्ने जस्ता काम भइरहेको अमेरिकामा रहेको ग्लोबल हेल्थ लका प्राध्यापक लरेन्स जस्टिनले बताउनुभयो । 

विश्व स्वास्थ्य सङ्गठन (डब्ल्यूएचओ) का अनुसार अहिले खोप विकास गर्ने दौडमा ६ वटाभन्दा धेरै कम्पनी तेस्रो तहको परीक्षणको अन्त्यतिर छन् । त्यसमा चीनका तीन, बेलायतको एक, अमेरिकाको एक र जर्मनी–अमेरिकाको संयुक्त प्रयासमा एक रहेका छन् । 

रुसले आफुले विकास गर्न लागेको खोपको सर्वाधिकार दर्ता नै गरिसकेको छ । चीनले पनि खाेपकाे सर्वाधिकार प्रदान गरेकाे छ । अध्ययनको तथ्याङ्क प्रकाशन नगरिकनै र व्यापक परीक्षण विना रुसले खोप दर्ता गरेको भन्दै पश्चिमा देशमा आलोचना भइरहेको छ । 

विश्व स्वास्थ्य सङ्गठनका प्रमुखले अगस्ट १८ तारिखमा धनी राष्ट्रले गरिब राष्ट्रलाई खोप बाँड्ने कार्यक्रममा हातेमालो गर्न आग्रह गर्दै खोप राष्ट्रवाद रोक्नुपर्ने बताउनुभएको थियो । 

तर अहिले शक्ति राष्ट्रहरुले यसलाई राष्ट्रवादको विषय बनाएकोले यसरी बनाइएका खोपको सुरक्षित अवस्थाबारे शङ्का रहने विज्ञहरुले बताएका छन् । source:ujyaaloonline

बेलारुसमा सरकारविरुद्ध प्रदर्शन चर्किँदै

भदौ १५,काठमाण्डौ  – बेलारुसमा सरकारविरुद्ध प्रदर्शन चर्किँदै गएको छ । राष्ट्रपति एलेक्जेडर लुकासेन्कोविरुद्ध हजारौँ मानिस सडकमा आएपछि अवस्था तनावपूर्ण बनेको हो । राजधानी मिन्स्कलगायतका ठाउँमा धेरैको संख्यामा प्रहरी खटाइएको बीबीसीले जनाएको छ।

अहिलेसम्म १ सय २५ जनालाई पक्राउ गरिएको बीबीसीले जनाएको छ । प्रदर्शनकारीले राष्ट्रपतिले पद छाड्नुपर्ने बताउँदै आएका छन् । 

गएको अगस्ट ९ मा भएको चुनावमा धाँधली गरेको भन्दै राष्ट्रपतिविरुद्ध प्रदर्शन हुँदै आएको छ । सन् १९९४ देखि सत्तामा रहेका लुकासेन्कोले ८० दशमलव १ प्रतिशत मत प्राप्त गरेको निर्वाचनसम्बन्धी निकाय सेन्ट्रल इलेक्सन कमिसनले बताएको छ । 

प्रमुख विपक्षी स्भेट्लाना तिखानोभ्स्कायाले भने १० दशमलव १२ प्रतिशत मात्रै मत प्राप्त गर्नुभएको छ । तर उहाँले राम्रोसँग गणना गरे आफूले ६० देखि ७० प्रतिशत समर्थन प्राप्त गरेको दाबी गरिरहनुभएको छ । चुनाव अगाडि  झण्डै ६ हजार ७ सयभन्दा धेरै व्यक्तिलाई पक्राउ गरी  प्रहरी हिरासतमा राखिएको खबरहरु सार्वजनिक भएका थिए । source:ujyaaloonline

लामो दूरीका गाडी र आन्तरिक उडान भदौ मसान्तसम्म नचल्ने

भदौ १४ काठमाण्डौ – सरकारले लामो दूरीका गाडी र आन्तरिक उडान भदौ मसान्तसम्म नचलाउने निर्णय गरेको छ । आइतबार बेलुकी बसेको मन्त्रिपरिषद बैठकले यस्तो निर्णय गरेको हो । यसअघि भदौ १५ अर्थात आजदेखि हवाई उडान खोल्ने तयारी सरकारले गरेको थियो । कोरोना सङ्क्रमण झन बढ्दै गएपछि मसान्तसम्म उडान स्थगित गर्ने निर्णय भएको सरकारले जनाएको छ । अन्तर्राष्ट्रिय उडान भने सर्त सहित भदौ १६ गतेदेखि सञ्चालन गर्ने निर्णय कायमै राखिएको छ । यस्तै विद्यालय र कलेजसहितका शिक्षण संस्थाहरु पनि भदौ मसान्तसम्म नखोल्ने निर्णय भएको छ ।

अर्घाखाँचीको शितगगांमा सर्पको टोकाईबाट एक जनाको मृत्यु

भदौ १४  अर्घाखाँची – उपचारमा ढिलाई हुँदा अर्घाखाँचीको शितगगांमा सर्पको टोकाईबाट एक जनाको ज्यान गएको छ । शितगंगा नगरपालिका वडा नम्बर–५ जुकेनामा सर्पले डस्दा ३५ वर्षिय यम बहादुर बेल्बासेको मृत्यु भएको वडा अध्यक्ष कमल पौडेलले जानकारी दिए ।

शनिवार राति सर्पले डसेका बेल्बासेलाई भौगोलिक विकटता र सवारीको पहुँच नहुँदा आईतवार बिहान मात्रै उपचारका लागि गोरुसिंगेको सर्पदंश उपचार केन्द्रमा लगिएको थियो । बिरामीको अवस्था गम्भिर भएपछी सर्पदंश उपचार केन्द्र गोरुसिंगेले प्रादेशिक अस्पताल बुटबल रिफर गरेको थियो । थप उपचारका लागि बुटबल लैजाँदै गर्दा बेल्बासेको बाटोमै मृत्यु भएको हो । एक्लो बस्ती भएका कारण शनिवार कुनै चाँसो नलिएपछी बिस्तारै विषले असर देखाउन सुरु गरेको थियो ।

विषको असर शरीरमा देखिएपछि मात्र बेल्बासेलाई अस्पताल लैजाने सुर गरिएको थियो । पहाडको सर्पले टोकेर खासै बिष नलाग्ने सोंचाई र लकडाउनका कारण सवारी साधनको सरल पहुँच नभएपछी सर्पले टोकेको झन्डै १६ घन्टापछी मात्र उनलाई गोरुसिङ्गे पुर्‍याइएको थियो।

source:lumbinipost.com