लकडाउन जेठ ३२ सम्म लम्बियो, अन्तर्राष्ट्रिय उडान असार १३ सम्म बन्द,सीमा नाका असार १६ गतेसम्म बन्द, कडाइ गर्न थप प्रहरी परिचालन गरिने

जेठ १८, काठमाण्डौ – सरकारले लकडाउनको समय १२ दिन थपेको छ । मन्त्रिपरिषद्को शनिबार बसेको बैठकले लकडाउन जेठ ३२ गतेसम्म लम्बाउने निर्णय गरेको हो । सरकारले पछिल्लो पटक थपेको लकडाउनको समय २० गते सकिँदैछ । यस्तै सरकारले अन्तर्रा्ष्ट्रिय सीमा नाका असार १६ गतेसम्म बन्द गर्ने भएको छ ।

मन्त्रिपरिषद्को बैठकले लकडाउन ३२ गतेसम्म लम्बाउने र सीमा नाका १६ गतेसम्म बन्द गर्ने निर्णय गरेको अर्थ, सञ्चार तथा सूचना प्रविधि मन्त्री तथा सरकारका प्रवक्ता डाक्टर युवराज खतिवडाले जानकारी दिनुभयो । त्यस्तै हवाई उडान असार १३ गतेसम्म बन्द हुनेछन् । सरकारले सीमा नाकामा थप कडाइ गर्ने भएको छ ।

सीमाबाट जथाभाबी नागरिक आउँदा कोरोनाको जोखिम झनै बढेकाले विश्व स्वास्थ्य सङ्गठनको मापदण्ड अनुसार स्वास्थ्य जाँच गरेर मात्रै नेपाल भित्रन दिने मन्त्रिपरिषद्को बैठकले निर्णय गरेको छ ।सीमा क्षेत्रबाट अवैध रुपमा आवत जावत भइरहेकाले सीमा क्षेत्रमा सशस्त्र प्रहरीको सङ्ख्या थप्ने र नेपाल प्रहरीलाई पनि परिचालन गरिने मन्त्री खतिवडाले जानकारी दिनुभयो ।

कोरोनाको प्रभाव बढी देखिएका ठाउँमा लकडाउन थप कडाइ गर्ने र सुरक्षा निकाय परिचालनको जिम्मा गृह मन्त्रालयलाई दिइएको पनि उहाँले बताउनुभयो । तर लकडाउनको मोडालिटीको बारेमा कोरोना रोकथाम तथा नियन्त्रण उच्चस्तरीय समन्वय समितिको बैठकले गृहकार्य गरेर टुङ्गो लगाउने मन्त्री खतिवडाले जानकारी दिनुभयो । शनिबार नै बसेको सुरक्षा परिषद्को बैठकले पनि कोरोना रोकथामको लागि सुुरक्षाकर्मीको उपस्थिति थप बलियो बनाउने निधो गरेको उहाँले जानकारी दिनुभयो ।

अमेरिकामा संक्रमितको संख्या १८ लाख नाघ्यो, भारतमा ५ हजार बढीको मृत्यु

जेठ १८,काठमाडौं : विश्वमा कोरोना भाइरसका (कोभिड १९) कारण मृत्यु हुनेको संख्या ३ लाख ७० हजार नाघेको छ । संक्रमितको संख्या ६१ लाख ५३ हजार ३ सय ७० पुगेको छ । वल्डोमिटरले पछिल्लो पटक सार्वजनिक गरेको तथ्यांकअनुसार अमेरिकामा सर्वा्धिक १८ लाख १६ हजार ८ सय २० जनामा संक्रमण पुष्टि भएको छ । कोरोना संक्रमणका कारण अमेरिकामा ज्यान गुमाउनेको संख्या एक लाख ५ हजार ५ सय ५७ पुगेको छ ।

त्यस्तै, ब्राजिलमा ४ लाख ९८ हजार ४ सय ४०, रुसमा ३ लाख ९६ हजार ५ सय ७५, बेलायतमा २ लाख ७४ हजार २ सय १९, स्पेनमा २ लाख ३९ हजार २ सय २८, इटालीमा २ लाख ३२ हजार ६ सय ६४ जनामा संक्रमण पुष्टि भएको छ । ब्राजिलमा २८ हजार ८ सय ३४ जनाको ज्यान गइसकेको छ ।

त्यस्तै, बेलायतमा ३८ हजार ३ सय ७६, इटालीमा ३३ हजार ३ सय ४०जनाको मृत्यु भइसकेको छ । विश्वभर २७ लाख ३४ हजार ५ सय ४८ जना संक्रमित अहिले संक्रमणमुक्त भइसकेका छन् । संक्रमणमुक्त हुनेको संख्या अमेरिकामा ५ लाख ३५ हजार २ सय ३८, ब्राजिलमा २ लाख ३ सय ७१, रुसमा १ लाख ६७ हजार ४ सय ६९, जर्मनीमा १ लाख ६४ हजार ९ सय ८ जना संक्रमणमुक्त भएका छन् ।

भारतमा मृत्यु हुनेको संख्या पाँच हजार १ सय ८५ पुगेको छ । त्यस्तै त्यहाँ एक लाख ८१ हजार ८ सय २७ जना संक्रमित रहेका छन् । भारतमा ८६ हजार ९ सय ३६ जना संक्रमित निको भइसकेका छन् । source:thahakhabar

नेपालमा काेराेना सङ्क्रमित १ हजार ४०१ पुगे, २१९ जना डिस्चार्ज

जेठ १७ – आज एकै दिन १ सय ८९ जना मानिसमा कोरोना भाइरस पुष्टि भएको छ । यस संगै देशमा सङ्क्रमितको सङ्ख्या १ हजार ४ सय १ पुगेको स्वास्थ्य तथा जनसङ्ख्या मन्त्रालयले जनाएको छ । यससंगै देशभरका ५३ जिल्लामा कोरोना फैलिएको छ । कपिलवस्तु १ सय ९, सर्लाहीमा १७, दैलेखमा १४ जना, सिरहामा ११, सप्तरीमा ९, धनुषामा ७ र रौतहटमा ६ जनालाइ कोरोना सङ्क्रमण पुष्टि भएको हो ।

यस्तै दाङमा ५, महोत्तरीमा ४, पर्सामा २, संखुवासमा २, झापामा १, ललितपुरमा १ तथा बारामा १ जनमा सङ्क्रमण पुष्टि भएको छ । संक्रमितमध्ये हालसम्म २१९ जना निको भएर घर फर्किइसकेका छन् । पछिल्लो २४ घण्टामा १३ जना डिस्चार्ज भएका हुन् ।

बुढानिलकण्ठ र टोखाका २ जना टेकु अस्पतालबाट, ९ जना बलम्बु अस्पतालबाट, अछामका १ जना, रुकुमका १ जना डिस्चार्ज भएका छन् । हालसम्म कोरोना संक्रमणले सिन्धुपाल्चोकमा एक, बाँकेमा एक, गुल्मीमा एक, बाराका एक, ललितपुरका एक र अर्घाखाँचीका एक गरी ६ जनाको मृत्यु भएको छ ।

क्वारेन्टाइनमा रहनेको संख्या १ लाख १० हजार ८८ जना रहेका छन् । आइसोलेसनमा रहनेको संख्या देशभरी १ हजार १ सय ७६ जना रहेको छ । मन्त्रालयका अनुसार आज सम्म नेपालमा आरडीटी विधिबाट १ लाख७ हजार ५५ नमुना परीक्षण भएका छन् । पीसीआर विधिबाट भने हालसम्म ६६ हजार ७ सय २९ परीक्षणहरु गरिएका छन् । सङ्क्रमितको पहिचानका लागि पिसिआर परिक्षणलाइ बढवा दिएको डा. देबकोटाले जानकारी दिनुभयो ।

अर्घाखाँचीमा साढे ३४ सय भन्दा धेरै क्वरेण्टीनमा


श्याम घिमिरे
जेठ १७ अर्घाखाँची –
रोजगारीको सिलसिलामा भारतका विभिन्न शहरमा गएका अर्घाखाँचीबासीहरु यतिबेला जिल्ला भित्रिरहेका छन् । जिल्लामा भारतबाट आउनेको संख्या दिनप्रतिदिन बढ्दै गईरहेको छ । भारत लगायत अन्य स्थानबाट आएका सबैलाई सम्बन्धीत पालिकाले निर्माण गरेको क्वरेन्टीनमा राखिएकोे छ । जिल्लाका ६ वटा स्थानीय सरकारले निर्माण गरेका बिभिन्न १ सय ६२ स्थानका क्वरेन्टीनमा सनिबार दिउँसो ३ बजेसम्म ३ हजार ४ सय ५३ जना व्यक्तिहरु रहेको अर्घाखाँचीका सहायक प्रमुख जिल्ला अधिकारी विनोद खनालले जानकारी दिनुभएको छ ।

जसमध्ये सन्धिखर्क नगरपालीकामा ५१२ जना, शितगंगा नगरपालीकामा ८०२ जना, भूमिकास्थान नगरपालीकामा ८७१ जना, छत्रदेव गाउँपालीकामा २३२ जना, मालारानी गाउँपालीकामा ६६३ जना र पाणिनी गाँउपालीकामा ३७३ जना रहेको सहायक प्रजिअ खनालले जानकारी दिनुभयो । अर्घाखाँचीका स्थानीय तहहरूले निरन्तर क्वरेन्टीनको संख्या बढाउदै गएको र त्यसमा बस्नेहरुको संख्या पनि बढ्दो रहेको प्रमुख जिल्ला अधिकारी बिजयराज पौडेलको भनाई रहेको छ । अधिकांस क्वरेन्टीनमा भारतबाट आएका मानिसहरु नै बसेको जनाईएको छ ।

हाल सम्म सन्धिखर्क नगरपालीकामा १६, शितगंगा नगरपालीकामा ५३, भूमिकास्थान नगरपालीकामा ३३, छत्रदेव गाउँपालीकामा १६, मालारानी गाउँपालीकामा २१ र पाणिनी गाँउपालीकामा २३ गरी कुल १ सय ६२ स्थानमा क्वरेन्टीनको निर्माण गरीएको सहायक प्रजिअ बिक्रम थापाले जानकारी दिनुभयो । पछिल्लो दिन मात्रै ९९ जना भारतबाट आएकाहरुलाई बिभिन्न पालीकाले निर्माण गरेका क्वरेन्टीनमा राखीएको छ । जिल्लाभर १ सय ६२ स्थानका क्वरेन्टीनमा ३५ सय ६४वटा बेड रहेको जनाईएको छ ।

डब्ल्यूएचओसँगको सम्बन्ध समाप्त भएको अमेरिकी राष्ट्रपति ट्रम्पको घोषणा

जेठ १७, काठमाण्डौ – अमेरिकी राष्ट्रपति डोनाल्ड ट्रम्पले विश्व स्वास्थ्य संगठन डब्ल्यूएचओसँगको सम्बन्ध समाप्त भएको घोषणा गर्नुभएको छ । उहाँले कोरोना भाइरसको रोकथाम र नियन्त्रणमा डब्लूएचओ असक्षम भएको र उसले चीनको मात्रै पक्षपोषण गरेको आरोप लगाउँदै डब्लूएचओसँगको अमेरिकाको सम्बन्ध सबै सकिएको बताएका समाचार संस्था सीएनएनले जनाएको छ ।

अमेरिकी राष्ट्रपति ट्रम्पले यस अघि डब्लूएचओले चीनको समर्थन गरेको भन्दै उ माथिको सहयोग रकम कटौती गर्ने घोषणा गर्नु भएको थियो । चीनले भने डब्लूएचओलाई आफूले सहयोग गर्ने बताउँदै आएको छ । चीनको वुहानमा सबेभन्दा पहिलो पटक देखिएको भनिएको कोरोना भाइरसको महामारीको प्रभाव अमेरिकामा धेरै परेपछि दुई देशको सम्बन्ध थप चिसिएको छ । कोरोना भाइरस सङ्क्रमित सबैभन्दा धेरै रहेका देशको सूचिमा अमेरिका पहिलो स्थानमा छ ।अमेरिकामा झण्डै १८ लाख सङ्क्रमित छन् भने त्यहाँ एक लाख ४ हजार जनाभन्दा धेरैको ज्यान गएको छ ।