लकडाउनलाई झन कडा बनाईदै, नाकामा अत्वाश्यक सवारीको पनि चेकजाँच

बैशाख २२, २०७७ काठमाडौं : चौथो पटक थपिएको अवधि सकिनै लाग्दा प्रहरीले काठमाडौं उपत्यकामा लकडाउनलाई कडा बनाएको छ।  अनावश्यक रुपमा सडकमा निस्किने, प्रहरीको आग्रह नमान्ने तथा तोकिएका बाहेकका पसलहरु सञ्चालन गर्ने व्यक्ति तथा सवारी साधनलाई आज बिहानै विभिन्न ठाउँबाट नियन्त्रणमा लिइएको छ। लकडाउनमा कार्यान्वयनमा कडाइ गर्न मुख्य सडकदेखि भित्रि सडकहरुसम्म बाक्लो रुपमा प्रहरी परिचालन गरिएको छ। 

कोरोना भाइरसका संक्रमितहरुको संख्या थपिएसँगै लकडाउनलाई थप प्रभावकारी बनाउन लागिएको महानगरीय प्रहरी कार्यालयका प्रमुख डिआईजी विश्वराज पोखरेलले जानकारी दिए।  त्यस्तै काठमाडौं उपत्यका भित्रिने नाकामा थप कडाइ गरिएको छ। नाकामा खटिएका सुरक्षाकर्मीलाई अत्यआवश्यक सवारीलाई मात्र छिर्न दिने निर्देशन दिइएको छ। आइतवार प्रधानमन्त्री केपी शर्मा ओलीले गृहमन्त्री रामबहादुर थापालाई सिमा नाकामा कडाइ गर्न निर्देशन दिएपछि थप कडाइ गरिएको हो। 

आइतवार दिउँसोसम्म जिल्ला प्रशासन कार्यालयबाट जारी भएको पास लिएर पनि मानिस काठमाडौं छिर्ने गरेका थिए। तर, अहिले अत्यावश्यक सवारीलाई पनि चेक गरेर प्रवेश गराउने गरिएको छ। सिडिओ कार्यालयबाट जारी भएको पास भएका सवारीलाई छिर्न नदिएपछि सिडिओले प्रहरीलाई फोन गरेर गुनासो गर्ने गरेका छन्।

Advertisement

थप ६ जनामा काेराेना सङ्क्रमण पुष्टि, सङ्क्रमितकाे सङ्ख्या ७५ पुग्याे

बैशाख २१,काठमाण्डाै – नेपालमा आइतबार थप १६ जनामा कोरोना भाइरसकाे सङ्क्रमण पुष्टि भएको छ । आज भएको परीक्षणमा नेपालगञ्जका १५ जना र पर्साका एक जना गरी १६ जनामा कोरोना पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

आइतबार दिउँसो नेपालगञ्जका ९ र पर्साका एक जनामा कोरोना पुष्टि भएकोमा अहिले नेपालगञ्जका थप ६ जनामा पनि कोरोना पोजेटिभ देखिएको हो । मन्त्रालयका सहप्रवक्ता डाक्टर समिरकुमार अधिकारीका अनुसार नेपालगञ्ज ८ का १६, २१ र ३४ वर्षका पुरुष तथा ४०, ५५ र ६० वर्षका महिलामा कोरोना पुष्टि भएको हो । उनीहरुलाई अस्पताल लैजाने तयारी भइरहेकाे छ ।

आज दिउँसो कोरोना पुष्टि भएका नेपालगञ्जका ९ जनामध्ये एक जना सात वर्षको बच्चा पनि रहेको मन्त्रालयका प्रवक्ता डाक्टर विकास देवकोटाले जानकारी दिनुभयो । उनी बालक वा बालिका भन्नेबारेमा भने केही पनि खुलेको छैन । उनी नेपालमा अहिलेसम्म कोरोना सङ्क्रमण पुष्टि भएका सबैभन्दा सानो उमेरका व्यक्ति हुन् ।

आज संक्रमण पुष्टि भएका ९ जनालाई नै नेपालगञ्जकाे कोरोना अस्पतालमा ल्याउन स्वास्थ्यकर्मीको टोली प्रभावित ठाउँमा पुगेको छ । डाक्टर देवकोटाका अनुसार अहिले विराटनगरमा ३१ जना, वीरगञ्जका आज भेटिएका एक जना नयाँ बिरामीसहित ९ जना तथा रुपन्देही, भरतपुर, नेपालगञ्ज र धनगढीमा एक/एक जना गरी ४४ जनाको उपचार भइरहेको छ ।

१६ जना भने उपचारपछि निको भएका छन् । मन्त्रालयका अनुसार आजसम्म १३ हजार चार सय १४ जनाको पीसीआर र ४९ हजार ६ सय ८८ जनाको आरडीटी विधिबाट कोरोना परीक्षण भएको छ । अहिले देशभरिका क्वरेण्टीनमा २१ हजार ९ सय ५१ जना रहेकाे पनि उहाँले जानकारी दिनुभयो । 

बंगालको खाडीबाट जलवाष्पयुक्त वायु नेपाल प्रवेश, बिहानैदखि पानी पर्न थाल्यो

बैशाख २२, २०७७ काठमाडौं : आज बिहानैदेखि देशका मध्य भेगमा पानी पर्न थालेको छ। हिजो पश्चिमी भेगमा बढि पानी परेकोमा आज मध्य हँुदै पुर्वमा पानी पार्नेक्रम सर्दै जाने जल तथा मौसम विज्ञान विभागको मौसम पुर्वानुमान महाशाखाले जनाएको छ।  पश्चिमी वायुको सामान्य प्रभाव, स्थानीय वायु तथा पूर्वी भूभाग नजिक बनेको न्यून चापिय क्षेत्रको प्रभाव हुनुका साथै बंगालको खाडी र अरब सागरबाटसमेत जलवाष्पयुक्त वायु नेपालमा प्रवेश गरिरहेकोले समौम बदली हुने र पानी पर्नेक्रम चलिरहेको मौसमविद प्रतिभा मानन्धरले जानकारी दिइन्। 

अहिले देशभरको मौसम सामान्यदेखि पुर्ण बदली रही पश्चिमी भूभागका केहि स्थान, काठमाडौंका केहि भाग र मध्ये क्षेत्रमा मेघ गर्जन र चट्याङ्गसहित वर्षा भइरहेको छ।  दिउँसो देशका पहाडी भुभागका केही स्थानहरूमा मेघगर्जन, चट्याङ र असिना तथा हावाहुरीसहित वर्षाको सम्भावना रहेको मौसमविद् मानन्धरले बताइन्।  राति पनि देशको अधिकांश भूभागमा आंशिक देखि सामान्य बदली रही पश्चिमी र मध्य भू–भागका थोरै  स्थान र  पूर्वी भूभागका केही स्थानमा मेघगर्जनसहित वर्षा हुनेछ।  

पहिचान हुन नसकेकाे राेगबाट १२ जनाकाे ज्यान गएपछि महाेत्तरीमा अनुसन्धान सुरु

बैशाख २२, २०७७ सोमबार महाेत्तरी – पहिचान हुन नसकेकाे रोगबाट १२ जनाको ज्यान गएपछि महोत्तरीमा विशेषज्ञ टोलीले अनुसन्धान सुरु गरेको छ । बर्दिबास नगरपालिका १२ र बर्दिबाससँगै सीमा जोडिएको भङ्गहा नगरपालिका ६ र ७ मा १२ जनाको ज्यान गएको हो । इपिडिमियोलोजी तथा रोग नियन्त्रण महाशाखा काठमाण्डाैकाे टोली महोत्तरी पुगेर के राेगकाे कारण ज्यान गएकाे हाे भन्नेबारेमा अनुसन्धान सुरु गरेको छ ।

विशेषज्ञ टोलीले स्क्रिनिङ र अनुसन्धानको काम थालेको र्‍यापिड रेस्पोन्स टिम कोभिड– १९ का स्रोत व्यक्ति गिरेन्द्र झाले जानकारी दिनुभयो । उहाँका अनुसार ज्यान गुमाएकामध्ये दुई जनाको कोरोना रिपोर्ट नेगेटिभ भएको छ । अरु १० जनाको रिपोर्ट आउन बाँकी छ । घटनाबारे थप अनुसन्धान गर्न धरानबाट समेत विज्ञ टोली खटिनेछ । source:ujyaaloonline

अमेरिकामा कोरोनाले साढे ६८ हजारको ज्यान लियो, झण्डै १२ लाख संक्रमित

बैशाख २२, २०७७ काठमाडौं :  विश्वभर कोरोना संक्रमितको संख्या साढे ३५ लाख नाघेको छ।   वल्डोमिटरले सार्वजनिक पछिल्लो तथ्यांकअनुसार कुल ३५ लाख ६२ हजार ७ सय ५९ जनामा कोरोना संक्रमण पुष्टि भएको छ। विश्भर मृत्यु हुनेको संख्या २ लाख ४८ हजार १ सय १६ पुगेको छ। 

त्यस्तै विश्वमा एकै दिन ८१ हजार ३ सय ३० जना नयाँ संक्रमित फेला परेका छन्।  संक्रमितको संख्या अमेरिकामा सर्वाधिक छ। त्यहाँ ११ लाख ८७ हजार ५ सय १० जनामा संक्रमण पुष्टि भएको छ। अमेरिकामा ६८ हजार ५ सय ८१ जनाको ज्यान गएको छ। पछिल्लो २४ घण्टामा अमेरिकामा १ हजार १ सय ३७ को ज्यान गएको तथ्यांक छ।  त्यस्तै, स्पेनमा २ लाख ४७ हजार १ सय २२ छन्। स्पेनमा अहिले सम्म २५ हजार २ सय ६४ जनाको ज्यान गएको छ।

 इटालीमा २ लाख १० हजार  ७ सय १७ जनामा संक्रमण भेटिएको छ। त्यस्तै २८ हजार ८ सय ८४ जनाको ज्यान गएको छ।   बेलायतमा १ लाख ८६ हजार ५ सय ९९ संक्रमित छन्। त्यहाँ २८ हजार ४ सय ४६ जनाको मृत्यु भएको छ।  फ्रान्समा १ लाख ६८ हजार ६ सय ९३ जनामा संक्रमण पुष्टि भएको छ। त्यहाँ मृत्यु हुनेको संख्या २४ हजार ४ सय ४६ रहेको छ।  विश्वभर ११ लाख ५३ हजार ८ सय ४७ जना कोरोना संक्रमित निको भएका छन्। source:thahakhabar