लकडाउनले समस्यामा पारेकालाई अर्घाखाँचीका स्थानीय तहद्धारा राहत वितरण ।

श्याम घिमिरे,
चैत २२ अर्घाखाँची
नोबेल कोरोना भाइरसका कारण देश लकडाउनमा रहेको अवस्थामा लकडाउनका कारण काममा जान नसकेका सन्धिखर्क नगरपालिकाका अतिविपन्न परिवार र दैनिक ज्यालादारी गरेर परिवार पाल्दै आइरहेका परीवारलाई सन्धिखर्क नगरपालिकाले राहत सामाग्री बितरण कार्य सुरु गरेको छ ।
दैनिक मजदुरी गरी जिबिकोपार्जन गर्ने र अति बिपन्न रहेका घरपरीवारलाई लकडाउनका कारण समस्या भएपछि नगरपालीकाको आकस्मीक बैठक बसी राहत वितरण गर्ने निर्णय गरेको सन्धिखर्क नगरपालिकाका प्रमुख कमलप्रसाद भुसालले बताए । भुसालले नगरपालीकाबाट वडाहरुमा पठाईएको खाद्य सामाग्रीहरु सबै वडाहरुबाट वडाअध्यक्षको संयोजनमा बितरण गर्ने बताए ।


वडाबाट प्राप्त तथ्यांक अनुसार पहिलो चरणमा १ हजार ४ सय ५६ घरपरिवारलाई राहत स्वरुप खाद्यान्न वितरण गरिने नगरपालीकाका प्रमुख प्रशासकीय अधिकृत जिबन ज्ञवालीले बताए । ज्ञवालीका अनुसार तिनवटा क्याटागरी बनाई राहत बितरण कार्य अगाडी बढाईएको बताए । जस अनुसार १ देखी २ जना सम्मको परीवारलाई १० केजि चामल, १ लिटर खाने तेल १ केजी दाल र १ केजी नुन बितरण गरीने छ भने ३ देखि ४ जना सम्मको परीवारलाई २० केजी चामल, डेढ लिटर खाने तेल,डेढ केजी दाल र १ केजी नुन बितरण गरीने बताईएको छ । यस्तै ५ जना वा सो भन्दा माथिको प्रती परीवारलाई ३० केजी चामल, २ लिटर खाने तेल, २ केजी दाल र १ केजी नुन बितरण गरीने ज्ञवालीले बताए ।


सन्धिखर्क नगरपालीकाका उपप्रमुख ठाकुर कुमार बिकले कोरोना भाइरस अर्थात कोभिड १९ को प्रभावले आफ्नो परिबामा दैनिकी सञ्चालनमा समस्या परेका अपाङ्ग,एकल महिला तथा आयस्रोत नभएका व्यक्ति तथा अति विपन्न परिवारलाई पहिलो चरणमा राहत वितरण गरिने बताए । बिकले नगरपालिकाका अन्य विपन्न परिवारको समेत खोजी गरी राहत वितरण गरिने जनाए । सन्धिखर्क नगरपालीकाले सनिबार सम्म सबै वडाहरुमा राहत बितरण गरीसक्ने उपप्रमुख बिकले जानकारी दिए ।

एक फरक प्रसंगमा बिकले संकटको यो घडीमा ब्यापारीहरुले दैनिक उपभोग्य बस्तु सहज रुपमा उपभोक्तालाई बिक्रिबितरण गर्न सबै व्यवसायीहरुलाई आग्रह गरेका छन । यस्तै बिकले दैनिक उपभोग्यबस्तुमा कालाबजारी गरेको पाईएमा कडाभन्दा कडा कारबाही गरीने समेत बताएका छन । उता बिकले नगरपालीका भित्र कोठाभाडामा लिई दैनिक ज्याला मजदुरी गरी गुजरा चलाउदै आईरहेका मजदुरहरुलाई घरधनिले यो अबधिको घरभाडा रकम छुटगर्न समेत आग्रह गरेका छन ।


यसैबिचै अर्घाखाँचीको पाणिनी गाँउपालीकाले पनि पहिलो चरणमा पालीका भित्र रहेका अतिविपन्न परिवार र दैनिक ज्यालादारी गरेर परिवार पाल्दै आइरहेका ५ सय ६० घरपरीवारलाई सर्बपक्षिय निर्णय अनुसार आबश्यकता र पहीचानको आधारमा राहत बितरण गर्ने पालीका अध्यक्ष अच्युत गौतमले बताए ।


छत्रदेब गाउँपालीकाले आफ्नै कार्यबिध बनाएर आबश्यकताको आधारमा राहत बितरण गर्ने पालीका अध्यक्ष लेखनाथ पोख्रेलले जानकारी दिए ।
यस्तै मालारानि गाउँपालीकाले पनि राहत वितरणको लागी सबैवडाहरुबाट नामावली संकलन भइरहेको र नाम सिफारिस भएर आउने बित्तिकै वडा कार्यालयको समन्वयमा राहत वितरण सुरु गर्ने प्रमुख प्रशासकिय अधिकृत बिष्णु घर्तिले बताए ।


भुमिकास्थान नगरपालीकाले पनि राहत वितरण गर्ने बताएको छ । पालीकाले राहत बितरणकोलागी वडालाई जिम्मा दिएको र वितरणको लागी नामावली संकलन भइरहेको प्रमुख प्रशासकिय अधिकृत नारायण प्रसाद भण्डारीले जानकारी दिए । भण्डारीले नाम सिफारिस भएर आउने बित्तिकै राहत वितरण सुरु गर्ने बताए ।


यता शितगंगा नगरपालिकाले राहत वितरण गर्ने निर्णय गरेर वडालाई जिम्मा दिएको छ । वडास्तरमा नामावली संकलन भइरहेको र नाम सिफारिस भएर आउने बित्तिकै निश्चित मापदण्ड बनाएर राहत वितरण गर्ने नगरप्रमुख सुर्यप्रसाद अधिकारीले जानकारी दिए ।

नेपालमा एकै पटक भेटिए तीनजना कोरोना संक्रमित ,विदेशबाट आएकाले स्थानीयलाई पनि सारेको पुष्टि

चैत २२, २०७६ काठमाडौं : नेपालमा एकैसाथ तीनजनामा कोरोना संक्रमण भएको छ। कैलाली र कन्चनपुरमा थप तीनजनामा कोरोना भाइरस (कोभिड-१९) पोजेटिभ देखिएको छ। स्वास्थ्य तथा जनसंख्या मन्त्रालयका अनुसार संक्रमितमध्ये एकजनामा स्थानीय संक्रमण पाइएको छ। अन्य दुईजना भने अन्य देशबाट आएका संक्रमित हुन्। 

मन्त्रालयका अनुसार सातौँ संक्रमित धनगढीका चौथो संक्रमित ३४ वर्षीय युवाकी भाउजु हुन्। यससँगै स्थानीयस्तरमै पनि कोरोना संक्रमण देखिएको हो। ३४ वर्षीया महिलामा यो संक्रमण पुष्टि भएको हो। पहिलो पटक नेपालमै बसेकामा पनि कोरोना भाइरसको संक्रमण देखिन थालेको हो। आठौँ संक्रमित कैलालीको लम्कीनिवासी पुरुषमा देखिएको छ। २१ वर्षीय ती युवक केही समयअघि भारतको मुम्बईबाट आएको खुलेको छ। क्‍वारेन्टाइनमा राखिएका उनमा शुक्रबार साँझ कोरोना पुष्टि भएको हो।

त्यसैगरी नवौँ संक्रमण कञ्‍चनपुरको पेरकोटका ४१ वर्षीय पुरुषमा देखिएको हो। उनी रोजगारीका क्रममा भारतको उत्तराखण्ड थिए। नेपाल आएपछि क्‍वारेन्टाइनमा राखिएका उनमा पनि शुक्रबारै कोरोना पुष्टि भएको हो। तीनैजनामा कोरोना संक्रमण पुष्टि भएपछि धनगढीस्थित सेती प्रादेशिक अस्पतालको आइसोलेसनमा उपचार थालिएको छ। कोरोना संक्रमित तीनैजनाको स्वास्थ्य सामान्य रहेको स्वास्थ्य मन्त्रालय स्रोतले जनाएको छ। 

स्वास्थ्य तथा जनसंख्या मन्त्रालयका अनुसार गत मार्च १९ मा दुबईबाट भारतको नयाँदिल्ली हुँदै धनगढी आएका चौथो संक्रमित युवकबाट उनकी भाउजुलाई पनि कोरोना संक्रमण भएको हो। ‘दुबईबाट आएका एक व्यक्तिबाट उनकी भाउजुमा पनि कोरोना सरेको छ’, स्रोतले भन्यो, ‘यसको अर्थ पहिलो पटक नेपालमा कोरोना विदेशबाट आएका व्यक्तिबाट यहीँ बसिरहेकामा पनि सरेको छ।’

मार्च १९ मा संयुक्त अरब इमिरेट्सको दुबईबाट एयर अरेबियाको जहाजमा कैलालीका ३४ वर्षीय युवक कोरोना संक्रमित भई धनगढी अस्पतालको आइसोलेसन वार्डमा उपचाररत छन्। कैलाली, कञ्‍चनपुरका तीनैजनामा परीक्षण गर्दा शुक्रबार राति संक्रमणको पुष्टि भएको हो। यसबाट विदेशबाट आएका व्यक्तिले कोरोना यहीँका परिवारजनमासमेत संक्रमण गराएको पुष्टि गरेको छ। परीक्षण गर्न गएकाहरुमा पोजेटिभ रिपोर्ट देखिए पनि अझै कयौँले परीक्षण गराउनै मानेका छैनन्।

विश्‍व स्वास्थ्य संगठनले पनि समुदायमा संक्रमण फैलिनुलाई सबैभन्दा जोखिम यसैलाई मानेको छ। अहिलेसम्म नेपाल सरकारले कोरोना विदेशबाट आएकाबाट समुदायमा नसरेको जनाउँदै आएको थियो। तर धनगढीको भेटिएको यो केस व्यक्तिबाट समुदायमा पुगेको पुष्टि भएको हो। इटालीमा पनि यसैगरी कोरोना व्यक्तिबाट समुदायमा फैलिएपछि महामारीको रुप लिएको थियो।

अहिलेसम्म नेपालमा फ्रान्स, बेल्जियम, दुबईबाट आएकामा कोरोना देखिएको थियो। यसअघि चैत २० मा कोरोना भाइरस छैटौं संक्रमित भेटिएका थिए। कतार एयरवेजको जहाजबाट गत चैत ४ मा दोहाबाट काठमाडौं आएका यात्रुलाई कोरोना संक्रमण भएको पाइएको थियो। यी संक्रमित बागलुङकी ६५ वर्षीया महिला थिइन्। उनी पनि चैत ४ मा बेल्जियमबाट कतार हुदै नेपाल आएकी थिइन। उनी कतारको दोहाबाट भने कतार एयरवेजको क्युआर ६५२ नम्बरको उडानबाट काठमाडौं आएकी थिइन्।

योसँगै कतारको एकै उडानबाट आएका तीन यात्रुमा कोरोना संक्रमण देखिएको थियो। त्यसअघि फ्रान्सबाट दोहा हुँदै काठमाडौं आएकी १९ वर्षीया युवती र बेल्जियमबाट त्यही मार्गबाट काठमाडौं आएकी बागलुङकी २२ वर्षीया युवतीमा कोरोना पोजेटिभ पाइएको थियो।  त्यसभन्दा पहिले दुबईबाट काठमाडौं हुँदै धनगढी पुगेका उनै ३४ वर्षीय युवकलाई कोरोना देखिएको थियो। उनको अहिले उनको सेती प्रादेशिक अस्पताल धनगढीमा उपचार भइरहेको छ। 

कोरोना भाइरसबाट संक्रमित तेस्रो व्यक्ति दुबईबाट आएका भेटिएका थिए। दुबईबाट आएका धादिङ निवासी ३२ वर्षीय पुरुषमा कोरोना संक्रमण भएको थियो। अहिले उनी टेकुस्थित शुक्रराज ट्रपिकल तथा सरुवा रोग अस्पतालमा उपचाररत छन्।  सुरुमा चीनबाट आएका एक विद्यार्थीमा जनवरी २३ मा कोरोना संक्रमण देखिएको थियो।

उनी उपचारपछि निको भइसकेका छन्। त्यसपछि ४ चैतमा फ्रान्सबाट कतारको दोहा हुँदै नेपाल आएकी १९ वर्षीया युवतीमा कोरोना संक्रमण देखिएपछि भने सरकारले देशभर लकडाउनको घोषणा गरेको छ। चैत ११ गतेदेखि १८ सम्मका लागि लागु गरिएको लकडाउन २५ चैत सम्मका म्याद थप गरिएको छ। source :thahakhabar.com


विश्वमा काेरोनाका कारण मृत्यु हुनेको संख्या ५९ हजार नाघ्यो, अमेरिकामा एकै दिन १३ सय भन्दा बढीको मृत्यु

चैत २२, २०७६ काठमाडौं : कोरोना संक्रमणबाट ज्यान गुमाउनेको संख्या ५९ हजार १ सय ३१ पुगेको छ।   शनिबार बिहानको तथ्यांक अनुसार विश्वभर कुल १० लाख ९७ हजार ९ सय ९ जनालाई कोरोना संक्रमण पुष्टि भएको छ। त्यस्तै, २ लाख २५ हजार ७ सय ९६ जना उपचारपछि निको भएका छन्।  विश्वमा एकैदिन कोरोना भाइरस संक्रमण साढे ८२ हजार भन्दा बढीमा भएको पाइएको छ। यो भाइरसबाट एकैदिन करिब ६ हजारको मृत्यु भएको छ। सबैभन्दा बढी बिरामी र मृत्यु हुनेको संख्या अमेरिकामा देखिएको छ। अमेरिकामा शुक्रबार एकैदिन ३२ हजार ८८ जनामा कोरोनाको संक्रमण देखिएको थियो भने १ हजार ३ सय २० जनाको मृत्यु भएको छ। 

इटालीमा शुक्रबार थप ४ हजार ५ सय ८५ जनामा कोरोना भाइरस देखिएको छ। सोही दिन इटालीमा ७ सय ६६ जनाको कोरोनाका कारण मृत्यु भएको छ। स्पेनमा शुक्रबार ७ हजार १ सय ३४ जनामा कोरोना भाइरसको संक्रमण देखिएको छ भने ८ सय ५० जनाको मृत्यु भएको छ।

जर्मनीमा शुक्रबार ६ हजार ३ सय ६५ जना कोरोनाका नयाँ बिरामी थपिएका छन्। सोही दिन जर्मनीमा कोरोना संक्रमणका कारण १ सय ६८ जनाले ज्यान गुमाएका छन्। चीनमा शुक्रबार ३१ जनामा मात्र कोरोनाको नयाँ संक्रमण देखिएको छ भने ४ जनाको मृत्यु भएको छ।

फ्रान्समा ५ हजार २ सय ३३ जना कोरोनाका नयाँ बिरामी थपिएका छन्। सोही दिन त्यहाँ १ हजार १ सय २० जनाको कोरोना संक्रमणका कारण मृत्यु भएको छ।

इरानमा शुक्रबार कोरोनाका कारण १ सय ३४ जनाको मृत्यु भएको छ भने २ हजार ७ सय १५ जना नयाँ संक्रमित थपिएका छन्।

बेलायतमा शुक्रबार नयाँ ४ हजार ४ सय ५० जनामा कोरोनाको संक्रमण देखिएको छ । सोही दन बेलायतमा ६ सय ८४ जनाको मृत्यु भएको छ।

टर्कीमा शुक्रबार कोरोना भाइरसको संक्रमणबाट ६९ जनाको मृत्यु हुनुका साथै थप २ हजार ७ सय ८६ जनामा संक्रमण देखिएको छ।

स्वीट्जरल्याण्डमा शुक्रबार नयाँ ७ सय ७९ जनामा कोराना भाइरसको संक्रमण देखिएको छ। सोही दिन त्यहाँ कोरोनाका कारण ५५ जनाले ज्यान गुमाएका छन्।

शुक्रबार बेल्जियमा १ हजार ४ सय २२, नेदरल्याण्ड्समा १ हजार २६, क्यानाडामा १ हजार ९२, ब्राजिलमा १ हजार १ सय ५० जनामा कारोनाको संक्रमण देखिएको छ। सोही दिन कोरोना भाइरस संक्रमणका कारण बेल्जियममा १ सय ३२, नेदरल्याण्ड्समा १ सय ४८, क्यानडामा ३५ र ब्राजिलमा ३९ जनाको मृत्यु भएको छ। बाँकीको मृत्यु र बिरामी अन्य देशमा थपिएका हुन्। source:thahakhabar.com