जिल्ला बिपत व्यवस्थापन समिति अर्घाखाँचीको बैठक सम्पन्न, अर्घाखाँचीको सिमावर्ती क्षेत्रमा हेल्थ डेस्क कक्ष राखिने ।।


सन्धिखर्क एफएम चैत ७ अर्घाखाँची-
जिल्ला बिपत व्यवस्थापन समिति अर्घाखाँचीको बैठक सुक्रबार सम्पन्न भएको छ । प्रमुख जिल्ला अधिकारी बिजयराज पौडेलको अध्यक्षतामा सम्पन्न बैठकले चैत्र १ गते परेको असिना पानिले शितगंगा नगरपालिका , भुमिकास्थान नगरपालीका तथा सन्धिखर्क नगरपालिकामा भएको क्षतिको प्राप्त स्थलगत रिपोर्टको अध्ययन गरि केन्द्र तथा प्रदेश सरकारमा राहत माग गर्ने निर्णय गर्नुका साथै ती क्षेत्रलाई असिनाग्रस्त क्षेत्र २०७६ घोषणा गर्न पनि सरकारलाई अनुरोध समेत गरेको छ ।

बैठकले महामारीको रूपमा बिश्वभर फैलिएको कोरोना भाईरसको सावधानीको बिषयमा गहन छलफल गरि महत्वपूर्ण निर्णयहरू गरेको छ । जसमा भारत बाट नेपाल भित्रीने व्यक्तीको स्वास्थ्य जाँचको लागि आवश्यक प्रकृया पूरा गरि चैत १० गते देखी पत्थरकोटको आसपासमा सुबिधायुक्त ठाउँको पहिचान गरि स्वास्थ्य चेक जाँच कक्ष राखिने निर्णय गरेको छ । साथै कोरोनाका बिरामि भेटिएमा उपचारकालागी ४५ शैयाको आईशोलेसन बेड निर्माणका लागि प्रदेश सरकार समक्ष माग गर्ने निर्णय समेत गरेको छ । यस्तैै स्थानीय सरकारलाई साबधानिको निम्ति आफ्नो तयारीमा तत्काल लाग्न अनुरोध गरेको छ । रोगको सन्त्रासका कारण गाउँघर फर्किने यात्रुहरुको आवागमनलाई मध्यनजर गर्दे गोरूसिङ्गे सन्धिखर्क मोटरबाटो चैत ८ बाट लगातार सुचारू गर्ने समेत बैठकले निर्णय गरेको छ ।

प्रतिनिधिसभा सदस्य टोपबहादुर रायमाझीको प्रमुख आतिथ्यतामा सम्पन्न बैठकमा प्रदेश सभा सदस्य चेतनारायण आचार्य जिल्ला समन्वय समिति प्रमुख पिताम्बर शर्मा ,सन्धिखर्क नगरपालिका प्रमुख कमल प्रसाद भुसाल ,शीतगंगा नगरपालिका प्रमुख सुर्यप्रसाद अधिकारी ,भुमिकास्थान नगरप्रमुख रेशम थापा,मालारानि गाउँपालिका अध्यक्ष बालकृष्ण आचार्य ,पाणिनि गाउँपालिका अध्यक्ष अच्युत गौतम , छत्रदेव गाउँपालिका अध्यक्ष लेखनाथ पोख्रेल ,सुरक्षा निकायका प्रमुखहरू जिल्ला स्वास्थ्य कार्यालय लगायत विभिन्न कार्यालयका कार्यालय प्रमुख, विभिन्न संघ संस्थाका प्रमुख तथा प्रतिनिधिहरू ,पत्रकार लगायतको उपस्थिति रहेको थियो ।

चैत ९ गतेदेखि २१ गतेसम्म बन्द नहुने अत्यावश्यक सेवा कुन कुन ?

 चैत ७, २०७६ शुक्रबार काठमाण्डाै – कोरोना भाइरसको रोकथामका लागि सरकारले आउँदो चैत ९ गतेदेखि २१ गतेसम्म अत्यावश्यक सेवा बाहेकका अरु सेवाहरु बन्द गर्ने घोषणा गरेको छ ।

प्रधानमन्त्री केपी शर्मा ओलीले शुक्रबार देशवासीको नाममा गर्नुभएको सम्बोधनमा भनिएको छ, ‘देशैभर संघ, प्रदेश र स्थानीय तहका सार्वजनिक, सामुदायिक तथा निजी सेवा प्रदायक संस्थाहरूबाट प्रदान गरिने नेपाल राजपत्रमा प्रकाशन गरिए अनुसारका अत्यावश्यक सेवा बाहेकका अन्य सबै सेवाहरु आगामी चैत ९ गतेदेखि चैत २१ गतेसम्म बन्द गरिएको छ ।’

नेपाल राजपत्रमा उल्लेखित अत्यावश्यक सेवाको सूची :

source:ujyaaloonline

कोरोना भाइरस : ज्यान गुमाउनेको सङ्ख्या १० हजार नाघ्यो, ज्यान गुमाउने चीनमा भन्दा इटलीमा धेरै

चैत ७, २०७६ शुक्रबार काठमाण्डाै – कोभिड–१९ अर्थात् कोरोना भाइरसका कारण ज्यान गुमाउनेको सङ्ख्या १० हजार नाघेको छ । एक सय ७९ देश र एउटा पानी जहाजमा फैलिएको कोरोनाका कारण अहिलेसम्म १० हजार ४१ जनाको ज्यान गएको अन्तर्राष्ट्रिय सञ्चारमाध्यमले जनाएका छन् ।

झण्डै दुई लाख ४५ हजार ३३ जना सङ्क्रमित भएकोमा ८८ हजार एक सय ५१ जना उपचारपछि निको भएका छन् भने बाँकीको उपचार भइरहेको छ ।

कोरोनाको सङ्क्रमण सुरु भएको चीनमा भन्दा इटलीमा ज्यान गुमाउनेको सङ्ख्या धेरै पुगेको छ । चीनमा तीन हजार दुई सय ४५ जनाको ज्यान गएको छ भने इटलीमा तीन हजार चार सय पाँच जनाले ज्यान गुमाएका छन् ।

इटलीमा पछिल्लो २४ घण्टामा चार सय २७ जनाले ज्यान गुमाएका छन भने पाँच हजार तीन सय २२ जना नयाँ सङ्क्रमित थपिएका छन् । ४१ हजार ३५ जना सङ्क्रमित भएको इटलीमा चार हजार चार सय ४० जना उपचारपछि निको भएका छन् ।

इटली, इरान, स्पेन, फ्रान्स, अमेरिका, बेलायत लगायतका देशमा नयाँ सङ्क्रमण र ज्यान गुमाउनेको सङ्ख्या उच्च रहेको छ । source:ujyaaloonline

भारतमा चार बलात्कारीलाई फाँसी दिइयो

चैत ७, २०७६ शुक्रबार काठमाण्डौ – सन् २०१२ मा भएको निर्भया सामूहिक बलात्कार काण्डका चारै जना दोषीलाई शुक्रबार बिहान भारतले मृत्युदण्ड दिएको छ । दोषीहरुलाई मृत्युदण्ड दिइसकेपछि निर्भयाकी आमाले यो न्यायको जित भएको प्रतिक्रिया दिएकी छिन् । 

भारतीय सञ्चारमाध्यमका अनुसार चारै जना दोषीलाई दिल्लीको तिहाड जेलमा बिहान साढे ५ बजे मृत्युदण्ड दिइएको हो । जेलका अधिकारीले समाचार एजेन्सी पीटीआईलाई भने, ‘चारै जनालाई एकैसाथ मृत्युदण्ड दिइयो ।’

दोषीहरुले मृत्युदण्ड पाइसकेपछि निर्भयाका बुवाले भने, ‘देशमा महिलाहरुका लागि यस्तो कानुन बनोस् कि जसमा मानिसहरुले लामो समयसम्म पर्खन नपरोस् ।’सात वर्षसम्म चलेकाे लामाे कानुनी लडाइपछि दाेषीहरुलाई सजाय दिइएकाे हाे । यसअघि पटक पटक मृत्युदण्डकाे मिति सारिँदै आएकाे थियाे । 

घटना के थियो ?

सन् २०१२ डिसेम्बर १६ को रातको समयमा दिल्लीमा २३ वर्षीया एक मेडिकल छात्रालाई गुडिरहेको बसमा ६ जनाले सामूहिक बलत्कार गरेका थिए । 
चार जना दोषीको अलावा एक प्रमुख आरोपी राम सिंहले ट्रायको दौरान तिहाज जेलमा आत्महत्या गरेका थिए । 

एक जना अपराधी, जो घटना हँदाको समयमा नाबालिग साबित भएका थिए, उनलाई सुधारगृह पठाइएको थियो । सन् २०१५ मा उनलाई सुधारगृहबाट रिहा गरिएको थियो । उनको नाम खुलाउन सकिँदैन । उनलाई सन् २०१३ अगस्ट महिनामा सुधारगृहमा तीन वर्ष बिताउने सजाय सुनाइएको थियो । अहिले उनी वयस्क भइसकेका छन् तर नियमका अनुसार उनको सजाय पूरा भइसकेको छ । अहिले उनी एउटा सहयोगी संस्थामा आबद्ध छन् किनकि बाहिर उनको सुरक्षा चिन्ताको विषय बनेको छ । source:ujyaaloonline