अर्घाखाँचीमा एवाईसी अन्तर पालिका स्तरीय भलिवल प्रतियोगीता हुने

श्याम घिमिरे कात्तिक ८ सन्धिखर्क
अर्घाखाँची युवा परिषद्को आयोजनामा जिल्लामै सर्वाधिक राशीको भलिवल प्रतियोगिता कात्तिक ९ गते शुक्रवार देखि सन्धिखर्कको टुडिखेलमा सञ्चालन हुने भएको छ । बिगतका वर्षमा जस्तै अहिले पनि परिषदले जिल्लाका छ वटै पालिकाका खेलाडीलाई प्रतिस्पर्धा गराउने भएको हो । भलिवल प्रतियोगितामा प्रथम हुने टिमलाई ५० हजार, दोस्रो हुने टिमलाई ३० हजार र तेस्रो हुने टिमलाई २० हजार नगदका साथ आकर्षक शिल्ड, मेडल र प्रमाणपत्र प्रदान गरिने परिषद्का अध्यक्ष काजी श्रेष्ठले बताए । रनिङ्गशिल्ड जित्ने टिमलाई नगद एक लाखको साथमा शिल्ड पनि प्रदान गरिने उनको भनाई छ ।

भलिवल प्रतियोगिताको उद्घाटन पुर्व उपप्रधानमन्त्री तथा नेकपा प्रभाबसाली नेता टोपबहादुर रायमाझीले गर्नेछन । भलिवल प्रतियोगीताको उद्घाटन समारोहमा सन्धिखर्कबाट ड्रोन क्यामरा उडाएर अर्घा दरवार र खाँची दरबारको दृश्य समेत छायांकन गर्ने कार्यक्रम रहेको अर्घाखाँची युवा परिषद्का महासचिब प्रकाश भुसालले जानाकारी दिए । एवाईसी अन्तर पालिकास्तरीय भलिवल प्रतियोगीताको यो दोस्रो सस्करण हो । गत बर्ष भुमिकास्थान नगरपालिकाले उपाधी जितेको थियो ।

प्रगतिशिल विवाह सम्पन्न

श्याम घिमिरे कात्तिक ७ अर्घाखाँची :
राष्ट्रिय जनमोर्चा अर्घाखाँचीको आयोजनामा सन्धिखर्क नगरपालिका वाडनम्बर २ मसालबजार निवासि शोभाखर भुसालकि कान्छि सुपुत्री अमृता भुसाल र सनपा ७ खाँचिकोट भालुखोला निवासि खुम बहादुर थापाका कान्छा सुपुत्र यादव बहादुर थापा बिच बुधबार प्रगतिशिल बिबाह सम्पन्न भएको हो ।

राजमो कार्यालयमा सम्पन्न प्रगतिशिल विवाहमा राजमो नेता शेर बहादुर बिसि,अ.ने.म.संघ केन्द्रीय उपाध्यक्ष शकुन्तला राना, बरका साईला बुबा गोबिन्द थापा लगायतले शुभकामना मन्तब्य राख्नु भएको हो । कार्यक्रम बधु अमृताका बुबा शोभाखर भुसालको अध्यक्षता दाजु कृष्ण भुसालको श्वागत मनतब्य र तुल्सिराम खनालको सन्चालन सम्पन्न भएको हो ।

स्वर्गिय ठाकुर भुसालको स्मृतिमा विरामीलाइ फलफुल वितरण

प्रेमनारायण आचार्य कार्तिक ७ अर्घाखाँची :अर्घाखाँचीको सन्धिखर्क नगरपालिका वाड नम्वर २ घट्टेटारी निवासी स्वर्गिय ठाकुर भुसालको स्मृतिमा विरामीलाइ  बुधबार फलफुल वितरण तथा जिल्ला अस्पताललाइ एक सेट स्टील बेन्च कुर्ची र चार थान टुल हस्तान्तरण गरिएको छ । प्रथम स्मृति दिवसको अवसर पारेर स्वर्गिय ठाकुरका बुबा आत्मराम भुसालले सन्धिखर्क अस्पतालमा भर्ना भएका विरामीलाइ फलफुल वितरण तथा जिल्ला अस्पतालमै विरामी तथा कुरुवालाइ सहजताको लागि बेन्च कुर्ची र टुल हस्तान्तरण गर्नु भएको हो । कार्यक्रममा जिल्ला अस्पताल अर्घाखाँचीका प्रमुख डाक्टर जगन्नाथ तिवारी, स्थानिय घनश्याम भुसाल, गुणनिधी भुसाल, उत्तममणि मिश्र लगायतको उपस्थिति रहेको थियो

संघीयता सफल भए देशकै अस्तित्व समाप्त हुन्छ – राजमो अध्यक्ष केसी

श्याम घिमिरे कात्तिक ७, अर्घाखाँची :
नेपाल सरकारका पुर्ब उपप्रधानमन्त्री एवं राष्ट्रिय जनमोर्चाका अध्यक्ष चित्र बहादुर केसीले नेपालमा संघियता सफल भएमा देशकै अस्तित्व समाप्त हुने बताउनु भएको छ । संसदमा संघियताको बिषयमानै छलफल नगरी जबर्जस्ती रुपमा ल्याइएको संघियताले देशको अस्तित्वनै समाप्त हुने भन्दै नेता केसीले राष्ट्रिय अखण्डता र सार्वभौमिकतालाई खतम पार्नका लागि विस्तारवादी शक्तिहरुकोे डिजाईनमा संघियता भित्राइएको बताउनु भएको हो ।

राष्ट्रिय जनमोर्चा अर्घाखाँचीको आयोजनामा बुधबार कोजागर्त पूर्णिमाको अवसर पारेर अर्घाको रानीगैरामा सम्पन्न गरीएको विशाल जनसभा तथा साँस्कृतिक कार्यक्रममा प्रमुख अतिथिको रुपमा मन्तब्य राख्दै अध्यक्ष केसीले यस्तो बताउनु भएको हो । कालान्तरमा पहाड र तराइलाई टुक्राएर नेपाललाई भारतमा गाभ्ने योजना अनुसार संघियता आएको दाबी गर्दै अध्यक्ष केसीले मुलुकमा संघियता टिके नेपाल रहन नसक्ने जिकिर समेत गर्नु भयो ।
बिदेशी दात्रीराष्ट्रबाट रिन खोजेर चलेको देशलाई संघियताले धान्न नसक्ने भन्दै केसीले पछिल्लो समय संघियता नेताहरुको लागी घाँटीमा अड्किएको हाडजस्तै भएको दाबी गर्नुभयो । अहिलेको सरकार ठेकेदार र माफीयाहरुको फन्दामा परेकोले सरकारले कुनैपनि काम गर्न नसक्ने बताउदै अध्यक्ष केसीले सबै कुराको समाधानको लागी देशमा नयाँजनबादी क्रान्तीको आबस्यकता रहेको बताउनु भयो । महंगी भ्रष्टचार र बलात्कार नियन्त्रण गर्न नसक्ने सरकारबाट जनताले केही आशा गर्न नसकिने भन्दै अहिलेको सरकार कम्युनिष्टको नभएको दाबी पनि गर्नुभयो ।

राष्ट्रिय जनमोर्चाका जिल्ला अध्यक्ष थम्मन केसीको अध्यक्षता,उपाध्यक्ष गोपाल पौडेलको स्वागत मन्तव्य र सचिव बाबुराम पन्थी सुनारको संचालनमा सम्पन्न कार्यक्रममा अखिल नेपाल किसान महासंघका केन्द्रिय अध्यक्ष भैरवराज रेग्मी,राष्ट्रिय जनमोर्चा प्रदेश नम्बर ५ का सदस्य शेर बहादुर बिसी, राजमो नेता सागर केसी,अखिल नेपाल महिला संघकी केन्द्रीय उपाध्यक्ष शकुन्तला राना, अखिल नेपाल युवक संघका केन्द्रीय सदस्य कुलराज खनाल,अखिल छैठौंका केन्द्रिय उपाध्यक्ष देवेन्द्र कुँवर लगायतका बक्ताहरुले मनतब्य राख्नु भएको हो ।

अर्घाखाँची सहित छिमेकी जिल्ला प्युठान,गुल्मी,कपिलवस्तु,रुपन्देही,पाल्पा लगायतका स्थानबाट हजारौं दर्शकहरुको सहभागिता रहेको कार्यक्रममा रक्तिम सांस्कृतिक अभियानका केन्द्र तथा जिल्लाका कलाकारहरूले विविध जनवादी सांस्कृतिक कार्यक्रम प्रस्तुत गरि दर्शकलाई भरपुर मनोरन्जन समेत प्रदान गरेका थिए ।
राष्ट्रिय जनमोर्चाले देशको समसामयिक राष्ट्रिय परिस्थिति र पार्टिको कार्यक्रम तथा धारणा सार्वजनिक गर्ने माध्यमको रुपमा पञ्चायती ब्यबस्था देखी हालसम्म निरन्तर अर्घाको रानीगैरामा गर्दै आइरहेको यो जनसभाले राष्ट्रिय स्तरमै महत्व राख्ने गरेको छ । यसैबिच बुधबारनै अर्घा भगबति मन्दीरमा सरायनाच समेत सम्पन्न भएको छ ।