असारे रोपाइको झल्को दिने गरी सन्धिखक १ पटुवाथुमा रोपाईजात्रा निकालियो

बिक्रम पाण्डे समानता भाद्र १२ अर्घाखाँची :असारे रोपाइको झल्को दिने गरी गाईजात्राको भोली पल्ट निकालिने रोपाइजात्रा आज अर्घाखाँची जिल्लाको सन्धिखर्क नगरपालीका वडा नं. १ पटुवाथुममा निकालिएको छ । पटुवाथुम हुलाक भैरव मन्दिरबाट सुरु भएको रोपाईजात्रा पटुवाथुममा रहेको पार्वती निम्न माध्यमिक विद्यालयमा आई पून भैरव मन्दिरमा गई समापन भएको थियो ।

रोपाइँ जात्रामा पञ्चे बाजाको तालमा गोरु जोत्ने, खोक लगाउने, धान रोप्ने गर्नुका साथै रोपाइँमा गाइने वालीगीत गाएर महिला तथा पुरुषहरु छमछमी नाचेका थिए । किसानहरुले पञ्चे बाजाको तालमा धान रोपाईको नक्कल गर्दे नाच्दै गाउँदै हिडेका हुन् ।नेवारी समूदायको चार्डको रुपमा मनाईने रोपाई जात्रामा अर्घाखाँचीमा भने अन्य समुदायका मानिसहरुले पनि रोपाई जात्रा मनाउने गर्दछन् ।

नेवारी समूदाय लगायत अन्य समुदायको पनि यो जात्रामा सहभागीता रहने हुनाले रोपाई जात्राको महत्व अझै बढ्दै गएको एक नेवार समुदाय अगुवा पटुवाथुम निवासी तारा श्रेष्ठले बताए । रोपाइँ जात्रामा पञ्चायत कालका साहू महाजनको झल्को मेटाउने गरी छाता ओडेर अघि पछि सहयोगी राखेर रोपाइँ हेर्ने साहु, ,जोगी, बाउसे बन्नुका साथै स्थानीय युवायुवतीहरुले भजन किर्तन समेत गाएका थिए । त्यस्तै सनपा ४ वाङ्लामा पनि रोपाई जात्रा निकालिएको छ भने जिल्लाका अन्य स्थानमा श्री कृष्ण जन्मास्टमीको अर्को दिन मनाउने प्रचलन रहेको छ ।

निबृत राष्ट्रसेवक समाज अर्घाखाँचीको बिशेष बैठक सम्पन्न

 सहयोगी बिसी भाद्र,१२ अर्घाखाँची : निबृत राष्ट्रसेवक समाज अर्घाखाँचीको बैठक विभिन्न ऐतिहासिक निर्णय गर्दे मंगलबार सम्पन्न भएको छ । समाजका केन्द्रिय सह–अध्यक्ष पिताम्बर बन्जाडेको प्रमुख आतिथ्यता केन्द्रिय सदस्य बिष्णु प्रसाद आचार्यको बिशिष्ट आतिथ्यतामा सम्पन्न बैठकमा जिल्ला स्थित ३ नगरपालिका र ३ गाउँपालिकाका पदाधिकारी तथा सदस्यहरुको उपस्थिति रहेको थियो ।

बैठकले यही भदौ १७ गते नगर तथा गाउँपालिका स्तरमा पेन्सन दिबस भब्यरुपमा मनाउने निर्णय गरेको छ । त्यस्तै बैठकले कार्तिक ११ गते सन्धिखर्कमा समाजको जिल्ला अधिबेशन गर्ने समेत निर्णय गरेको छ ।

बैठकमा प्रमुख अतिथी पिताम्बर बन्जाडेले समाजको केन्द्रिय नीति,तथा कार्यक्रमका बारेमा प्रकाश पार्नु भएको थियो । समाजका कार्यबाहक जिल्ला अध्यक्ष बलदेव भुसालको अध्यक्षता र सचिब भिमलाल आचार्यको संचालनमा सम्पन्न बैठकमा सचिब भिमलाल आचार्य द्वारा प्रस्तुत सांगठनिक प्रतिबेदन र कोषाध्यक्ष साबित्रा पिसि द्वारा बार्षिक लेखापरीक्षण एवं आर्थिक प्रतिबेदन प्रस्तुत गर्नुभएको थियो ।प्रतिबेदन उपर व्यापक छलफल सहित प्रतिबेदन पारित गरिएको छ ।

बैठकमा समाजका सन्धिखर्क नगर कार्यबाहक अध्यक्ष ढुण्डिराज न्यौपाने ,भुमिकास्थान नगर अध्यक्ष राजेन्द्र शर्मा ,सचीव चन्द्र श्रेष्ठ ,मालारानी गाउँपालिका अध्यक्ष थानेश्वर खनाल ,पाणिनिका अध्यक्ष दामोदर पोखरेल ,शितगंगा नगरका अध्यक्ष सुमन्त पौडेलले पालिका स्तरको समाजको प्रगती विवरण र रायसुझाब प्रस्तुत गर्नु भएको थियो ।

बैठकको सहजीकरण जिबनारायण खनाल र दुर्गा प्रसाद पौडेलले गर्नु भएको थियो । बैठकमा बुद्धिराम गैरेले माटोको सुगन्ध नामक कबिता संग्रह पुस्तक बितरण गर्नु भएको समाजका केन्द्रिय पार्शद पुष्पा न्यौपानेले बताउनु भयो ।

शिक्षकले यौन दुर्व्यवहार गरेको उजुरी

भदौ १२, २०७५ उदयपुर :  शिक्षकले यौन दुर्व्यवहार गरेको भन्दै विद्यार्थीका आफन्तले प्रहरीमा उजुरी दिएका छन्। त्रियुगा नगरपालिका ४ राष्ट्रिय उच्च मावि बगाहाका शिक्षक वीरेन्द्र बस्नेतले १२ वर्षीया बालिकालाई जबरजस्ती गर्न खोजेको भन्दै शुक्रवार जिल्ला प्रहरी कार्यालयमा उजुरी परेको हो। घरमै रहेकी बालिकालाई बाहिर बोलाएर जबरजस्ती करणी गर्न खोजेको भन्दै अभिभावकले शिक्षकविरुद्ध प्रहरीमा उजुरी दिएको जिल्ला प्रहरी कार्यालय उदयपुरका डिएसपी मेघराज अधिकारीले बताए।

पढाउने बहानामा बाहिर बोलाएर घरपछाडि एकान्तमा लगी जबरजस्ती गर्न खोज्दा बालिकाले प्रतिकार गर्न थालेपछि बस्नेत भागेको पीडितका आफन्तको भनाइ छ। ‘करणीको प्रयास गरेको भन्दै बालिकाको आफन्तले उजुरी दिएका छन्,’ डीएसपी अधिकारीले भने, ‘फरार शिक्षक बस्नेतलाई खोजिरहेका छौँ।’ मुलुकी अपराध संहिताको दफा २२५ अनुसार करणी गर्ने आशयले बालबालिकालाई अस्वाभाविक रूपमा एकान्तमा लगे, यौनांग छोए, यौनजन्य अस्वाभाविक व्यवहार गरे बाल यौन दुर्व्यवहार गरेको मानिने उल्लेख छ।  बाल यौन दुर्व्यवहार गर्ने व्यक्तिलाई तीन वर्ष कैद र तीस हजार रुपैयाँसम्म जरिवाना हुने कानुनी व्यवस्था छ।
source:thahakhabar.com