अटो र सिटी रिक्साको मनपरि : ३० रुपैयाँको ठाउँमा ५ सय भाडा

झापा, वैशाख २१ – सिण्डिकेट व्यवस्था खारेजीको विरोध गर्दै राष्ट्रिय यातायात व्यवसायी महासंघमा आवद्ध व्यवसायीहरूले लामो तथा छोटा दूरीका सवारीसाधन ठप्प पारेपछि सर्वसाधारण मर्कामा परेका छन् ।

झापाको काँकडभिट्टाबाट छुट्ने कुनै पनि सवारी साधन नचलेकाले सर्वसाधारण यात्रु मारमा परेका छन् ।

लामो तथा छोटो दूरीका सवारीसाधन नचल्दा यात्रुहरुले अटो र सिटी रिक्सालाई विकल्पका रुपमा प्रयोग गर्न पाएका छन् । तर महङ्गो भाडा तिर्न बाध्य छन् ।
सामान्यतया अन्य समयमा झापाको काँकरभिट्टाबाट बिर्तामोड सम्मको भाडा ३० रुपैयाँ पर्नेमा आज गाडी बन्द हुँदा यात्रुहरुले ४ सय देखि ५ सयसम्म भाडा तिर्नु पर्ने बाध्यता छ ।

अटो चालकहरुले भने अटो पेट्रोलले चलाउनु पर्ने र पेट्रोल महंगो परेका कारण आफूहरुले महंगो भाडा लिन परेको अटो चालक ममला धिमालको भनाई छ ।  source:ujyaloonline

Advertisement

पश्चिम रुकुममा जीप दुर्घटना हुँदा एकजनाको मृत्यु

डोल्पा : रुकुम र जाजरकोटको सिमानामा पर्ने पश्चिम रुकुमको गोतामकोटमा जीप दुर्घटना हुँदा एक जनाको मृत्यु भएको छ। दुर्घटनामा ६ जना घाइते भएका छन्। शुक्रबार बिहान ९:३० बजे गोतामकोटबाट जाजरकोटका लागि यात्रु लिएर छुटेको ज १ज ५९०२ नम्बरको जीप ब्रेक फेल भएर दुर्घटना भएको प्रहरीले जानकारी दिएको छ।

दुर्घटनामा परी  आठबिसकोट नगरपालिका ४ का ३२ वर्षीय कर्णबहादुर बुढाको मृत्यु भएको हो। घाइते सबैको रुकुमको राडिज्यूलामा रहेको अस्पतालमा उपचार भइराखेको छ।

तिब्र गतिको जीपको ब्रेक फेल हुँदा गम्भीर दुर्घटना भएको अनुमान प्रहरीको छ। दुर्घटनापछि चालक फरार छन्। प्रहरीले चालकको खोजी भइरहेको जानकारी दिएको छ। प्रहरीले गाडीधनी सोही नगरपालिका खिमबहादुर बुढालाई नियन्त्रणमा लिएको छ।
source:annapurnapost

प्रहरी खोरमा यातायात व्यवसायी (फोटो फिचर)

 प्रहरीले सार्वजनिक सवारी साधन बन्द गर्ने व्यवसायीलाई पक्राउ गरेको छ। देशभरबाट प्रहरीले सिन्डिकेटको पक्षमा लागेर सवारी साधन बन्द गर्ने यातायात व्यवसायीलाई पक्राउ गरेको हो। गृहमन्त्री रामबहादुर थापाको निर्देशन लगत्तै प्रहरीले देशभरका विभिन्न स्थानबाट यातायात व्यवसायीलाई पक्राउ गरेको हो। धरानबाट मात्र व्यवसायीको नेतृत्व गर्दै आएका सात बढी व्यवसायीलाई प्रहरीले पक्राउ गरेको छ।

सार्वजनिक सवारी साधन बन्द गराएको अभियोगमा प्रहरीले नेपाल राष्ट्रिय यातायात व्यवसायी महासंघका केन्द्रीय उपाध्यक्ष कृष्ण सुवेदी, पूर्वाञ्चल यातायात संघका अध्यक्ष सरोज श्रेष्ठ, संयुक्त बस व्यवसायी संघका अध्यक्ष नरेन्द्र पोमु, सप्तकोसी बस व्यवसायी संघका सचिव हरि थापा, व्यवसायी राजन कट्टेल, राम परियार लगायतलाई पक्राउ गरिएको छ।

गृहमन्त्री थापाले गाडी बन्द गर्नेलाई पक्राउ गरी कारवाही  गर्न निर्देशन दिए लगत्तै धरानका यातायात व्यवसायीहरुलाई प्रहरीले पक्राउ गरेको इलाका प्रहरी कार्यालय धरानका डिएसपी रामेश्वर पौडेलले बताए। उनले  सार्वजनिक यातायातका साधन बन्द गरी सर्वसाधारणलाई दुःख दिएको अभियोगमा यातायात व्यवसायीहरुलाई पक्राउ गरिएको बताए।

उनले पक्राउ परेका व्यवसायीविरुद्ध  मुद्दा लगाउने विषयमा माथिल्लो निकायससँग राय माग्ने काम भइरहेको बताएका छन्। प्रहरीले पक्राउ गर्न थालेपछि यातायात व्यवासायीबीच भाग दौड मच्चिएको छ।

सार्वजनिक यातायात ठप्प पारेर जनतालाई दुःख दिएपछि गृहमन्त्रीले थापाले देशभरका प्रमुख जिल्ला अधिकारीहरुलाई लिखित निर्देशन पठाउँदै अत्यावश्यक सेवा संचालन ऐन २०१४ अनुसार गाडी संचालन नगर्ने व्यवसायीहरुलाई पक्राउ गर्न निर्देशन दिएका हुन्। ऐनमा ६ महिनासम्म कैदसम्म गर्न सकिने व्यवस्था छ।

गाडी बन्द गर्ने व्यवसायीलाई पक्राउ गर्न गृहमन्त्रीको निर्देशन
पश्चिम यातायात बस व्यवसायी समितिका उपाध्यक्ष पक्राउ
गाडी बन्द गर्ने ६ व्यवसायी धरानबाट पक्राउ
प्रहरी सुरक्षामा बस सञ्चालन
लमजुङमा यातायात सेवा रोक्ने समितिका पदाधिकारी पक्राउ
पक्राउ पर्ने डरले पोखराका यातायात व्यवसायीको भागाभाग  

source:annapurnapost

यातायात व्यवसायी महासंघका महासचिव सिटौला पक्राउ

काठमाडौं, वैशाख २१ – नेपाल यातायात व्यवसायी राष्ट्रिय महासंघका महासचिव सरोज सिटौला पक्राउ पर्नुभएको छ ।

महासंघको शुक्रबार घर ग्यारेजमा सवारी थन्काउने कार्यक्रम थियो भने गृहमन्त्री रामबहादुर थापाले यातायात सेवा ठप्प पार्ने व्यवसायीहरुलाई पक्राउ गर्ने आदेश दिनुभएको थियो ।

उहाँलाई रिपोर्टर्स क्लब नेपालको साक्षात्कार कार्यक्रममा भाग लिन आउँदा क्लबको कार्यालय परिसरबाटै पक्राउ गरिएको हो ।

सादा पोशाकमा आएका प्रहरीले सिटौलालाई पक्राउ गरेर महानगरीय प्रहरी परिसर टेकुमा लगेको छ । क्लबमा आउनुअघि उनले क्लबका अध्यक्ष ऋषि धमलालाई टेलिफोन गरेर पक्राउ पर्ने सम्भावना भएकाले कार्यक्रममा आउँ कि नआउँ भनेर सोधेका थिए ।

सरकारी निकायका सरोकारवाला पनि साक्षात्कारमा आउने जानकारी पाएपछि उहाँ रिपोर्टर्स क्लबमा जानभएको थियो । source:ujyaloonline

समाजलाई सु–सुचित पार्ने संचार योद्धाहरु सधै निष्पक्ष सुचना प्रवाहमा लाग्नुपर्छः बरिष्ठ पत्रकार डा.आचार्य

गोपाल प्रसाद भट्टराई,बैशाख–२१,अर्घाखाँची 
सुचना तथा संचार प्रविधि मन्त्रालय अन्तरगत सुचना विभागको आयोजनामा सन्धिखर्कमा आयोजित पत्रकारका लागि प्रमुख कानुन र आचारसंहिता विषयक तिन दिने तालिम बिहिबार सकिएको छ ।

संचार गृह र पत्रकारीता क्षेत्रलाई अझ बिश्वस्निय र सन्तुलित बनाउने उदेश्यका साथ संचालित तालिममा सहजीकरण गर्दै पत्रकार महासंघका पुर्व केन्द्रीय अध्यक्ष डा.शुरेश आचार्यले समाजलाई सु–सुचित पार्ने संचार गृहका योद्धाहरु सधै आत्म अनुशासित बन्दै सत्य तथ्य र निष्पक्ष सुचना प्रवाहमा लाग्नुपर्नेमा जोड दिनुभएको छ ।

नेपाल पत्रकार महासंघ अर्घाखाँचीको समन्वयमा जिल्लामा क्रियाशिल ४० जना पत्रकार तथा संचारकर्मीको सहभागिता रहेको तालिममा गाली बेइज्जती ऐन,सुचनाको हक,न्युनतम पारिश्रमिक ऐन,राष्ट्रिय प्रसारण ऐन लगायतका बिषयमा पत्रकार महासंघका पुर्व केन्द्रीय अध्यक्ष डा. आचार्य,सुचना विभागका निर्देशक सुमन बर्जाचार्य,डा.विजय मिश्र,लगायतले प्रशिक्षण दिनुभएको थियो ।

तालिमको समापन गर्दै महासंघका जिल्ला अध्यक्ष हिम लेकालीले राष्ट्र र जनताको हितमा काम चलाउनु नै पत्रकारको धर्म भएकाले कसैको धम्की,प्रलोभनमा नपरि निर्धक्क भएर पेशामा लाग्न आग्रह गर्नुभएको छ ।उहांले नियम संगत काम गर्ने मिडिया र मिडियाकर्मीको बिपक्षमा हुने गतिबिधिलाई निस्तेज पार्न आफु जस्तोसुकै कदम चाल्नपनि पछाडि नहट्ने उद्घोष गर्नुभएको छ ।